Што сакаме од храната денес? Само добар вкус или очекуваме таа да придонесе и за нашето здравје, енергија и секојдневна благосостојба?
Глобалните трендови во прехранбената индустрија покажуваат дека потрошувачите сè повеќе обрнуваат внимание на нутритивниот состав на производите. Протеините, влакната, количината на шеќер и функционалните состојки стануваат важни фактори при изборот на храната.
Во најновата анализа објавена на 6 ноември, истражувачката компанија Innova Market Insights ги издвојува нутритивната густина, персонализираниот пристап кон протеините и новите сетилни искуства како значајни насоки за развојот на храната и пијалаците во 2027 година.
Еден од најинтересните трендови е таканаречениот Nutrient Density Design – концепт според кој производите треба да обезбедат што поголема нутритивна вредност. Потрошувачите не гледаат само колку калории содржи еден производ, туку и што добиваат со неговото консумирање.
Протеините, на пример, повеќе не се резервирани само за спортистите и фитнес-заедницата. Тие стануваат дел од секојдневната исхрана, вклучувајќи појадоци, грицки, десерти и пијалаци. Паралелно со ова, расте интересот за намалување на шеќерот. Според анализата на Innova, 39 проценти од потрошувачите глобално велат дека јадат помалку шеќер.
Но, тоа не значи дека луѓето се подготвени да се откажат од уживањето. Напротив, производителите сè повеќе експериментираат со нови текстури, необични комбинации и интензивни вкусови. Токму спојот на здравствени придобивки и гастрономско задоволство се издвојува како една од најинтересните насоки.
За рестораните, пекарниците, слаткарниците и производителите на храна ова значи нов предизвик: понудата треба да одговори на потребата за поквалитетна исхрана, без да го жртвува вкусот. Храната на иднината нема да биде само здрава или вкусна. Потрошувачите сè повеќе очекуваат да биде и едното и другото.
Фото: pixabay.com
