Од манастир стар 300 години до луксузен хотел: Ова ново место во Лисабон ги зачувува старите детали, но носи модерен луксуз (ФОТО)

Еден од интересните хотелски проекти што ја збогатуваат есенската туристичка понуда во Европа пристигнува во срцето на Лисабон. Corpus Christi Lisboa – Leonardo Limited Edition е сместен во поранешен манастир од XVIII век, во историскиот дел на градот, а неговото отворање е најавено за октомври.

Хотелот ќе има 132 соби, но идејата не е старото здание целосно да се претвори во модерен, препознатлив хотел без трага од своето минато. Напротив, при реконструкцијата се зачувуваат историските елементи на објектот, со што гостите ќе престојуваат во простор кој и понатаму го носи карактерот на некогашната градба. Токму овој спој на историја и современ комфор е еден од главните адути на проектот.

Покрај собите, хотелот ќе има и ресторан од повисока категорија, што дополнително го става гастрономскиот дел во центарот на целото искуство. Наместо само место за преспивање, концептот се движи кон идејата хотелот да биде дел од самото доживување на градот – од архитектурата и ентериерот, до храната и престојот.

Corpus Christi Lisboa е значаен и затоа што со него Leonardo Hotels за првпат го носи брендот Leonardo Limited Edition на Пиринејскиот Полуостров. Лисабон така добива уште еден хотел во кој старата архитектура не е скриена зад современи решенија, туку станува еден од главните делови на приказната.

Фото: leonardo-hotels.com