Пребарување
ПИЈАЛАК 19.11.2026

Хуго шприц со брусница: Празнична верзија на омилениот коктел со „просеко“

Marija Lukarevska

Класичниот хуго шприц го поврзуваме со летните денови, но неговата зимска верзија е одличен избор за празничните собири и наздравувања

Хуго шприцот со брусница ги задржува препознатливите цветни ноти на ликерот од бозел, но добива малку поинаков карактер благодарение на киселкастиот сок од брусница. Резултатот е освежителен, лесен и прекрасно балансиран коктел, со привлечна црвена боја.

Посебната арома ја дава ликерот St-Germain, кој внесува нежна цветна сладост без да го направи пијалакот премногу сладок. Свежото нане и лиметата дополнително ја нагласуваат неговата свежина, додека просекото и газираната вода му ја даваат препознатливата пенливост.

Уште една предност е што коктелот може да се подготви во поголема количина, па многу е практичен за празнични забави и дружења. Доволно е во голем бокал да ги измешате сокот од лимета, листовите нане, ликерот од бозел и сокот од брусница. Смесата чувајте ја во фрижидер, а просекото и газираната вода додавајте ги непосредно пред послужувањето, за коктелот да ја задржи својата пенливост. Послужете со мраз, свежо нане и парчиња лимета.

Мал совет: ако сакате поблага и послатка верзија, изберете засладен сок од брусница наместо незасладен.

Состојки за 12 чаши:
  • 180 мл свежо цеден сок од лимета (од околу 6 лимети)
  • 20 свежи листови нане, плус неколку за декорација
  • 720 мл сок од брусница
  • 360 мл ликер St-Germain
  • мраз
  • 2 шишиња просеко (по 750 мл)
  • 2 лименки газирана вода или тоник со вкус на бозел (по околу 240 мл)
  • резанки лимета за декорација
Приготвување:

1. Во голем бокал ставете ги сокот од лимета и листовите нане. Лесно притиснете ги листовите со толчник за да ги ослободат своите ароми.

2. Додајте ги сокот од брусница и ликерот St-Germain, па промешајте за состојките да се соединат.

3. Наполнете ги чашите со мраз и во секоја сипете околу 120 мл од подготвената смеса.

4. Дополнете со околу 120 мл просеко и малку газирана вода.

5. Декорирајте со свежо нане и резанка лимета и послужете веднаш.