ЕКСПЛОЗИЈА НА НОВ ТРЕНД: Виетнамското кафе станува нов профитабилен хит во угостителството низ Европа

Виетнамското кафе сѐ посилно навлегува во понудата на кафе-баровите низ Европа и сѐ почесто се позиционира како категорија меѓу класичното кафе и десертите, при што станува сегмент што бележи стабилен и континуиран раст.

По појавата на корејското далгона-кафе, мачата, руското раф-кафе и бранoт напитвки со латe-основи и сезонски вкусови, на европските пазари, вклучувајќи го и нашиот, сѐ повеќе се пробива виетнамското кафе — нов облик на консумација што нуди јасна приказна, препознатлив вкус и силно сетилно доживување.

Традиција што прераснала во светски феномен

Културата на пиење кафе во Виетнам се развила под француско влијание во XIX век, но со текот на времето добила сопствен, препознатлив израз. Поради недостиг на свежо млеко, кондензираното млеко станало основна состојка, внесувајќи густина и изразена слаткост, со што напитокот се доближил до десерт.

Во комбинација со сортата робуста, кафето добило силен вкус и специфичен карактер, поради што денес е препознатливо ширум светот.

Најпознатата варијанта е кафе со млеко и мраз (cà phê sữa đá) — силно кафе што се подготвува преку специјален филтер и капе директно врз слој од кондензирано млеко, а потоа се служи со мраз. Со мешање се добива кремаст, слатко-горчлив напиток што често станува прв избор на гостите.

Покласичната варијанта, црно кафе со мраз (cà phê đen đá), претставува едноставен, но интензивен напиток и често служи како основа за современи интерпретации со цитрус, кокос или газирана вода.

Виетнамско кафе со јајце — десерт во чаша

Особено внимание во последните години привлекува кафето со јајце (cà phê trứng). Пена од жолчка и шеќер се нанесува врз силно кафе, создавајќи текстура што потсетува на тирамису или кремасти десерти. Во угостителската понуда, оваа напивка сѐ почесто се позиционира како десерт во чаша.

Современите кафулиња нудат и варијанти со кокос, каде што кафето се комбинира со кокосов крем или млеко, создавајќи тропски вкусен профил што е визуелно привлечен и погоден за промоција на социјалните мрежи.

 

View this post on Instagram

 

A post shared by Dina (@oliveoilandlemons)

Начин на приготвување

Подготовката со специјалниот виетнамски филтер бара поинаков ритам и трпеливост.

• На дното од чашата се става кондензирано млеко (околу 20–30 мл), кое претставува прв слој.
• Се поставува филтерот и во него се додава грубо мелено кафе, кое лесно се притиска.
• Се прелева со врела вода, по што кафето почнува бавно да капе врз млекото.
• Се создава јасен слоевит изглед — темно кафе горе, светол слој под него.
• По завршување на капењето, напитокот се промешува и се добива кремаста, карамелна структура.
• Се додава мраз и напитокот е подготвен за послужување.

 

View this post on Instagram

 

A post shared by Laah-Chee (@laahchee)

Зошто овој тренд е профитабилен?

Од деловен аспект, виетнамското кафе претставува исклучително исплатлив производ. Состојките се евтини, додека перцепцијата кај гостите е дека станува збор за специјалитет со висока вредност.

Дополнително:

• ниски трошоци за подготовка
• брза и едноставна изработка
• не е потребна скапа опрема
• можност за претходна подготовка
• висока перцепција на вредност кај гостите

Оваа комбинација го прави идеален производ за зголемување на приходите во угостителството, особено во објекти што се насочени кон модерна и визуелно атрактивна понуда.

Виетнамското кафе не е само уште еден тренд, туку нов модел на угостителска понуда во кој вкусот, приказната и визуелниот впечаток имаат еднаква тежина. Во сѐ поконкурентната угостителска сцена, токму ваквите производи сѐ почесто ја прават разликата меѓу обично мени и понуда што се памети и се враќа.

Фото: Инстаграм