Од елен и диви капини до костен, смокви и самоникнати билки – познат хрватски ресторан откри што ќе се јаде оваа есен

Хрватскиот ресторан „Небо“ од Риека ја претстави новата есенска гастрономска приказна, во која на едно место ги спојува различните пејзажи и вкусови на Хрватска. Новото дегустациско мени беше претставено на Трсатската тврдина, а зад концептот стои шефицата Габриела Филца, која инспирацијата ја барала во Лика, но и во Јадранот.

Идејата е гостите преку храната да поминат своеобразно гастрономско патување. Во чиниите се појавуваат сезонски и локални намирници, самоникнати билки и производи типични за различни хрватски региони. Посебен акцент е ставен и на пристапот „од поле до маса“, како и на минимизирањето на отпадот при подготовката на храната.

Меѓу јадењата има комбинации кои на прв поглед звучат необично, но токму во нив е идејата на менито. На гостите им се сервираат јадења со буза, љутика и чичока, како и ловрански костен со чуваркуќа. Една од покарактеристичните комбинации е елен со диви капини, додека во десертите се појавуваат вкусови како глог и смоква. Со секое јадење се избира и соодветно вино, со што целото мени е замислено како заокружено дегустациско искуство.

Ресторанот „Небо“ веќе има сериозно место на хрватската гастрономска сцена. Според објавените информации, шеста година по ред ја задржал Мишелиновата ѕвезда, а има и признанија од Gault&Millau и Falstaff. Новото есенско мени, сепак, не се потпира само на престижот, туку на идејата локалните намирници да се претстават во поинакво, современо издание – нешто што станува сè позастапен пристап во европската гастрономија.

Pexels