„Зачинот на ангелите“ – италијанска кулинарска тајна што освојува сè повеќе гурмани

Доколку мислевте дека морачот веќе го покажал целосниот свој потенцијал во кујната, време е да го запознаете неговиот највреден дел – поленот од морач. Овој ароматичен зачин, познат и како „зачинот на ангелите“, со векови се користи во италијанската гастрономија, а денес сè почесто се појавува во менијата на врвните ресторани ширум светот.

Нежниот жолт полен се собира од цветовите на дивиот морач и е ценет поради својата интензивна арома, која во концентрирана форма го доловува препознатливиот вкус на ова растение.

Што е полен од морач?

Морачот е растение од кое речиси секој дел може да се искористи во кујната. Главицата е одлична за салати, печени јадења и прилози, стеблата можат да се користат како замена за целер, семките се незаменлив зачин за колбаси, печива и маринади, а зелените гранчиња се одличен свеж додаток за декорација.

Но, вистинскиот гастрономски бисер е токму неговиот полен.

Станува збор за ситен, златножолт прав што се добива од цветовите на дивиот морач. Во Италија е познат како finocchio selvatico, а поради неговата златна боја и исклучително богатиот мирис го нарекуваат и „зачинот на ангелите“.

Најчесто потекнува од медитеранските региони, каде што дивиот морач природно расте.

Каков вкус има?

Иако се користи во многу мали количини, поленот од морач има исклучително богат вкус.

Потсетува на препознатливата арома на анасон, но е поблаг и порафиниран. Покрај слаткастите ноти што потсетуваат на анасон и сладунец, се чувствуваат и нежни цветни и цитрусни ароми, со суптилен меден шмек.

Токму оваа комбинација го издвојува од другите зачини со сличен вкус. Наместо силна и остра арома, поленот нуди полесен, посвеж и поземјест карактер, кој им дава длабочина на јадењата без да ги надвладее останатите состојки.

Поради интензивната арома, доволен е само мал прстофат за целосно да го промени вкусот на едно јадење.

Во кои јадења најдобро се користи?

За месо, риба и зеленчук

Во италијанската кујна поленот од морач традиционално се користи како зачин за свинско месо и морски плодови, но одлично се комбинира и со печена риба, зеленчук и различни медитерански специјалитети.

Може да се додава како завршница врз готовото јадење, но и да биде дел од маринади, суви мешавини од зачини,  сосови и преливи.

Одлично се согласува и со другите форми на морач– свежиот корен или семките – со што се добива уште побогат и послоевит вкус.

Одличен избор и за десерти

Иако на прв поглед звучи необично, поленот од морач прекрасно се вклопува и во слатките десерти.

Само малку од овој зачин може да им даде нова димензија на сладоледот, панакотата, чизкејкот или различни кремасти десерти.

Одлично се комбинира и со колачи, бисквити и други печива, особено кога сакате да внесете дискретна ароматична нота што ќе го направи вкусот поинтересен и пософистициран.

Неочекуван додаток во коктелите

Поленот од морач сè почесто се користи и во модерната миксологија.

Неговите цветни, билни и цитрусни ароми совршено се вклопуваат во коктели со медитерански билки, цитруси или ликери, а најчесто се користи како финален зачин што го збогатува мирисот и вкусот на пијалакот.

Освен што придонесува за поизразена арома, неговата златножолта боја додава и впечатлив визуелен ефект.

Малку количество, голема разлика

Една од најголемите предности на поленот од морач е тоа што се користи во многу мали количини. Само еден прстофат е доволен за да внесе нова длабочина во вкусот и да го направи секое јадење поароматично и порафинирано.

Токму затоа овој древен медитерански зачин, кој долго време беше добро чувана тајна на италијанските готвачи, денес заслужено го освојува своето место и во домашните кујни ширум светот.