Соџу – што е, каков вкус има и како правилно се пие?

Што е соџу?

„Традиционално, соџу е алкохолен пијалак направен од ориз во Кореја, но со текот на времето, начинот на производство значително се промени“, вели Џеси Вида, оперативен партнер во сингапурскиот коктел-бар Cat Bite Club, специјализиран за пијалаци базирани на ориз и агаве.

„Околу 90 проценти од соџуто што денес се продава е таканареченото green-bottle (соџу во зелено шише), кое најчесто ќе го сретнете во корејските ресторани за скара надвор од Кореја“, додава тој.

Оваа верзија најчесто се произведува од житарки и скроб, како јачмен, сладок компир и тапиока, а најчесто се служи заедно со пиво или макголи – традиционално корејско оризово вино.

„Во 1950-тите години, за време на Корејската војна, производителите не смееле да користат ориз за производство на соџу бидејќи бил неопходен за исхрана на населението. Наместо тоа, почнале да увезуваат тапиока од Југоисточна Азија, и токму така настанало соџуто во зелено шише“, објаснува Боби Јун, роден во Бусан и сопственик на ресторанот Yoon Haeundae Galbi во Њујорк.

Во 1990-тите повторно било дозволено користење ориз за производство на соџу.

Соџуто направено исклучиво од ориз и денес е многу ценето бидејќи има малку посладок вкус. Но, според Фил Абовд, косопственик на Southside Parlor во Сеул, уште поинтересни се верзиите во кои се комбинира ориз со јачмен или пченица.

„Тие имаат поизбалансиран вкус и подобро го покажуваат вистинскиот карактер на соџуто“, вели тој.

Каков вкус има соџу?

„Во Кореја велиме дека соџу има вкус како животот – еден ден е сладок, друг ден горчлив, а понекогаш едноставно е чист и мек“, раскажува Јун.

Традиционалното соџу направено од ферментиран бел ориз има свеж, чист вкус, со лесни ноти на јаболко и повремено суптилна арома на препечен ориз.

Често го нарекуваат „корејска вотка“, бидејќи е меко, лесно и со неутрален вкус, но содржи речиси двојно помалку алкохол од класичната вотка.

„Има повеќе текстура и нијанси отколку што повеќето луѓе мислат. Затоа е одлично за коктели што се мешаат, но за жал ретко се користи на тој начин“, објаснува Абовд.

Тој советува дека, кога се подготвува коктел со соџу, вкусот треба да остане едноставен и ненаметлив за да не се изгубат неговите суптилни ароми.

Кои се правилата при пиење соџу?

Во корејската култура, бонтонoт при пиење алкохол е многу важен.

„Кога луѓето јадат заедно, возраста игра голема улога“, објаснува Абовд.

Најмладиот на масата традиционално им ги полни чашите на сите присутни. Кога некој ќе ви налее соџу, чашката треба да ја прифатите со двете раце, како знак на почит.

Вообичаено, чашата не треба да остане празна. Ако сакате да престанете да пиете, оставете малку соџу на дното – тоа е дискретен знак дека не сакате дополнување.

„Никогаш нема да видите Кореец сам да си налева соџу – тоа се смета за непристојно“, вели Абовд.

И уште едно интересно правило: кога наздравувате, не е вообичаено да гледате директно во очите на соговорникот, туку погледот се насочува малку настрана.

Како најчесто се пие?

Најтрадиционално, соџуто се служи добро изладено, без мраз и без додатоци, во мали чашки.

Многу популарен е и сомек – комбинација од соџу и пиво. Името е спој од зборовите соџу и маекџу (корејски збор за пиво).

Сомек се подготвува така што во лесно пиво се додаваат неколку чашки соџу. Најчесто се користат корејските пива Hite или Cass.

Полесните видови соџу понекогаш се користат и во коктели, иако тоа не е многу честа практика.

„Како и кај секој алкохолен пијалак – поевтините верзии најчесто се мешаат во коктели или се пијат како шотови, а поквалитетните се пијат чисти“, вели Вида.

Премиум соџуто, кое обично содржи околу 40 проценти алкохол, е одлично за поинтензивни коктели или едноставно со газирана вода.

„Мојот омилен начин е наједноставен – соџу, газирана вода и малку сок од лимета“, вели Абовд.

Соџуто може да се комбинира и со сок од јаболко, круша или јапонско јаболко (персимон), како и да се ароматизира со билки како смрека или јасмин. Сепак, експертите советуваат да не се меша со многу слатки и кремасти овошја, како банана или киви, бидејќи тие лесно го прикриваат неговиот препознатлив вкус.

Во ресторанот на Боби Јун се користат различни видови соџу за различни коктели – Hwayo 25 за полесни комбинации, Hwayo 41 за поинтензивни пијалаци, а Damsoul Pine, со своите суптилни ноти на бор, е идеален за освежителен хајбол.

Со каква храна најдобро се комбинира?

Во Кореја постои посебен поим – анџу, кој ги опфаќа сите јадења што традиционално се служат со алкохол.

Тоа може да бидат пржен зеленчук, месо, улична храна, но и класични корејски специјалитети како галби (маринирани ребра), булгоги (маринирано говедско месо), како и свежа морска храна, остриги, ракчиња, ракови и школки, особено во крајбрежните области.

Бидејќи соџуто е лесно и освежително, одлично ја балансира масната и потешка храна. Затоа совршено се комбинира со свински стомак, говедски ребра, стекови, брискет и други месни специјалитети.

Токму затоа речиси е незаменлив дел од корејската скара ширум светот.

„Убавината на соџуто е што можете да го пиете со речиси сè – со храна против мамурлак, тестенини со богат сос од месо, школки во бело вино, но ние особено го сакаме со рамен или чорби со интензивен вкус“, вели Јун.

Тој ја завршува приказната со уште една корејска изрека:

„Чорбата го загрева телото, а соџуто го разладува.“

Кај нас, можете да пробате соџу во Soju Bar во Diamond Mall – уникатно место за корејска храна, интересни коктели и добра атмосфера.

 

View this post on Instagram

 

A post shared by Sojubar Macedonia (@sojubar.mk)