Од Бангкок до Сиднеј, овие десет хотели ја претвораат гастрономијата во главна атракција
Некогаш најдоброто нешто што хотелот можеше да ви го понуди по долг ден патување беше сендвич од собна послуга, помфрит и ладен пијалак. Денес, ситуацијата е малку поинаква. Најдобрите хотели во светот сè почесто не се места каде што само преспивате, туку дестинации на кои вреди да отпатувате токму поради храната и пијалаците.
Трендот го потврдува и најновата листа на Food & Wine, која во рамките на Global Tastemakers Awards 2026 ги издвојува десетте најдобри хотели во светот за храна и пијалаци. Наместо хотелските ресторани да бидат само практична опција за гостите, тие сè почесто ангажираат врвни готвачи, користат локални производи и создаваат гастрономски искуства поради кои гостите можеби и нема да имаат потреба да го напуштат хотелот.
Еве кои хотели се најдоа на листата:
View this post on Instagram
На врвот на листата е Capella Bangkok, елегантен бутик-хотел со поглед кон реката Чао Праја. Главната гастрономска ѕвезда е ресторанот Côte, каде што се служи француско-италијанска кујна под раководство на познатиот готвач Мауро Колагреко.
Но гастрономската понуда не завршува тука. Хотелот има и ресторанот Phra Nakhon со тајландски специјалитети, мирен Tea Lounge покрај езерце со лилјани, како и Stella – впечатлив коктел-бар со сребрено-килибарен ентериер.
Во срцето на Рим, La Minerva е хотел кој го спојува раскошот на историска палата со модерна гастрономска сцена. Хотелот располага со два ресторана, а особено се издвојува Gigi Rigolatto Roma со прекрасна тераса и поглед кон Пантеонот.
На менито се наоѓаат италијански класици како аранчини со тартуфи, модар патлиџан со пармезан и шпагети alle vongole со ботарга. За коктели тука е La Minerva Bar, каде што неизбежен избор е – негрони.
View this post on Instagram
Ако постои место кое навистина ја претвора храната во начин на живот, тоа е Babylonstoren. Сместен во познатиот вински регион Франшхук, овој хотел функционира како голем гастрономски имот со сопствена градина од околу пет хектари.
Производите што растат таму се користат во трите ресторани – Babel, Greenhouse и Old Bakery. Гостите можат да уживаат во свежи производи, да шетаат низ овоштарниците, да учат како се прави кисело тесто или да препознаваат различни билки на работилниците организирани во самиот имот.
View this post on Instagram
За оние кои сонуваат за вечера во Osteria Francescana на Масимо Ботура, но не можат лесно да направат резервација, постои едно особено интересно решение: престој во неговиот хотел Casa Maria Luigia.
Малиот хотел со само 12 соби е сместен во зеленилото на Емилија-Ромања, а гастрономијата е во самиот центар на искуството. Во ресторанот Francescana at Maria Luigia се служи дегустациско мени од девет јадења, додека Al Gatto Verde е градинарски ресторан со скара под раководство на готвачката Џес Росвал.
View this post on Instagram
На 33 ката над токиските крошни се наоѓа Aman Tokyo, хотел кој ја спојува тивката луксузност со сериозна гастрономска понуда. Тука има италијански ресторан, извонредна слаткарница, простор за попладневен чај и коктели, но вистинската ѕвезда е Musashi, каде што се служи омакaсе суши во интимен простор со само осум места.
Шефот Хиројки Мусаши не се занимава само со подготовка на суши – самиот изработува керамика за ресторанот и одгледува ориз во префектурата Јаманаши.
View this post on Instagram
До овој легендарен хотел на островот Џудека се стигнува со брз глисер од плоштадот „Сан Марко“. А токму изолираноста од венецијанската гужва е дел од неговиот шарм.
Hotel Cipriani има пет ресторани и барови, а особено се издвојува терасата на Cip’s Club со поглед кон „Сан Марко“. По вечерата, гостите можат да се вратат во градот и да тргнат на организирана тура низ најдобрите венецијански вински барови.
View this post on Instagram
Aliée во Истанбул е првиот хотел на француското Paris Society надвор од Франција и нуди гастрономија која ги спојува локалните турски вкусови со глобални влијанија.
Меѓу концептите се издвојуваат неаполско-турски пици печени во бакарна печка покрај вода, чајни церемонии со мешавини од познат истанбулски чаен бренд, како и ресторан со grain bowls и биодинамички вина.
View this post on Instagram
Во Mandarin Oriental храната има речиси еднакво значење како и самиот хотел. Од десетте ресторани и барови особено се издвојува Man Wah, ресторанот со една Мишелинска ѕвезда.
На менито се наоѓаат специјалитети како гулаб полнет со абалон, јастог со ѓумбир и млад кромид, како и традиционалната пекиншка патка. Гостите имаат и други опции – од британски паб и јапонски изакаја до ресторан на покривот под водство на шефот Даниел Булуд.
View this post on Instagram
Доколку сакате хотел во кој никогаш не мора да ви биде здодевно, Atlantis The Royal е токму таков. Огромниот комплекс има 10 ресторани, односно 17 ако се земат предвид и рестораните во соседниот Atlantis The Palm.
Меѓу нив се наоѓаат познати имиња како Carbone, Dinner by Heston Blumenthal и La Mar на готвачот Гастон Акурио. Со други зборови, за врвна вечера не мора ни да излезете од хотелскиот комплекс.
View this post on Instagram
На последното место на листата е мал бутик-хотел со само 14 соби, отворен во 2025 година во поранешен сиднејски паб.
Хотелот го основале готвачот Џош Најланд и неговата сопруга и деловна партнерка Џули, а неговата најголема предност е приоритетното резервирање во ресторанот Saint Peter, кој има три „chef’s hats“ од Good Food Guide.
Вечерата може да започне со Oyster Shell Martini, а потоа продолжува со дегустациско мени од девет или 11 јадења, со врвни специјалитети.
Она што ги поврзува овие десет хотели е идејата дека добрата храна станува една од главните причини поради кои патниците избираат каде ќе престојуваат. Наместо гостите да мора да одбираат меѓу истражување на локалната гастрономија и вечера во хотелот, најдобрите хотели денес се обидуваат да им го понудат и едното и другото.
И можеби токму тука лежи новиот луксуз: да поминете цел ден откривајќи го градот, а навечер да знаете дека ве очекува уште едно одлично гастрономско искуство – без да морате повторно да барате каде да јадете.
ФОТО: ИНСТАГРАМ
Добрата соба повеќе не е единствениот адут – гостите сакаат хотел во кој можат да јадат, да пијат и да доживеат нешто посебно.
Од Барселона до Венеција, водечките туристички центри воведуваат нови давачки за престој. Хотелиерите се исправени пред предизвик: како да го оправдаат поскапувањето без да ги изгубат гостите?
Класичниот термос со филтер-кафе пред вратата конечно заминува во минатото. Луксузните хотели го претвораат појадокот во приватна представа и незаборавно фото-искуство.
Добар бар, квалитетно кафе, премиум пијалаци и добро осмислена храна стануваат важен дел од целото хотелско искуство.
Дознајте ги први сите новитети, ексклузивни понуди и настани!
