Аспираторот во кујната е леплив од маснотии? Еве го трикот за чистење без долго рибање

Чистењето на кујнскиот аспиратор сигурно не е меѓу омилените домашни обврски. Маснотијата што се собира со месеци се лепи за филтрите, рабовите и внатрешноста, па обично следуваат сунѓер, средства за одмастување и долго триење. Но, постои начин целата работа да биде значително полесна – чистење со пареа.

Парниот чистач со топла пареа ги омекнува и најтврдокорните масни наслаги, по што тие многу полесно се отстрануваат со крпа. На тој начин нема потреба постојано да нанесувате силни средства и да ја триете истата површина одново и одново.

Еве како да го исчистите аспираторот

Пред да почнете, задолжително исклучете го уредот од струја. Извадете го филтерот и поставете го на стара крпа, па поминете го со пареа од двете страни. Откако маснотијата ќе омекне, избришете ја со микрофибер крпа.

Ако аспираторот има заштитен капак околу светлото, внимателно отстранете го и исчистете го и тој дел. Посебно внимание посветете на внатрешноста, каде што маснотијата често се собира во тешко достапни делови. За нив може да се користи тесен додаток на парниот чистач.

Потоа исчистете ја долната страна, рабовите и просторот околу прекинувачите. Крпата менувајте ја почесто, бидејќи во спротивно наместо да ја отстранувате маснотијата, само ќе ја размачкувате.

На крајот поминете го и надворешниот дел од аспираторот. Доколку има масни наслаги во малите процепи околу копчињата, може внимателно да ги отстраните со чепкалка. Со пареа може да се исчисти и дел од ѕидот зад шпоретот.

Внимавајте каде ја користите пареата

Иако овој начин е практичен, не значи дека пареата е погодна за секоја површина во кујната.

Особено треба да се избегнува директно изложување на лакирани дрвени елементи, бидејќи високата температура може да го оштети завршниот слој или да го деформира дрвото. Внимателно треба да се чистат и одредени глинени плочки.

Кај камените површини подобро е да се користи пониска или средна температура. Од друга страна, парниот чистач е погоден за метални површини, керамички плочки и ламинат.

Откако сите делови ќе се исчистат и исушат, филтерот се враќа на место, а аспираторот повторно се приклучува. Ако не сакате следниот пат да поминете низ истата мака, вакво темелно чистење може да правите на секои шест месеци до една година, зависно од тоа колку често готвите.

pexels