Кучето не е секогаш добредојден гостин во ресторан: Непишани правила што секој сопственик треба да ги знае

Дали некогаш сте влегле во кафуле и сте затекнале куче покрај шанкот, додека неговиот сопственик нарачува кафе? Или сте забележале дека некој без двоумење влегува со миленикот во објект на чија врата јасно пишува дека се дозволени исклучиво службени кучиња? Иако на сопствениците можеби им изгледа како безопасна ситуација, за вработените и останатите гости тоа не мора да биде така.

Според угостителскиот професионалец Дарон Кардоса, кој има повеќе од 30 години искуство во ресторанската индустрија, еден од најголемите проблеми е игнорирањето на правилата. Некои сопственици сметаат дека нема ништо лошо во тоа накратко да влезат во кафуле со кучето, особено ако само сакаат да нарачаат пијалак за носење. Но тоа што престојот ќе трае пет минути не значи дека правилата престануваат да важат.

Дополнително, ваквите ситуации ги ставаат вработените во незгодна позиција. Никој не сака да влезе во конфликт со гостин или да биде прогласен за личност што не сака животни, но истовремено има обврска да ги почитува правилата на објектот. Затоа, одговорноста не треба да паѓа врз келнерите, баристите и останатиот персонал, туку пред сè врз сопствениците на милениците.

Хигиената не е единствената причина

Рестораните и кафулињата се простори во кои се подготвува, послужува и консумира храна, па присуството на животни може да биде ограничено поради хигиенски прописи, но и поради интерните правила на самиот објект. Дури и кога станува збор за мирно и добро воспитано куче, неговото присуство не е автоматски дозволено.

Не треба да се заборават ниту останатите гости. Не секој е љубител на кучиња, некои луѓе имаат алергии, а други едноставно не сакаат да седат непосредно до животно додека јадат. Она што за еден гостин е симпатично дружење со миленикот, за друг може да биде непријатно искуство.

Секако, ова не значи дека кучињата немаат место во угостителството. Напротив, сè повеќе објекти имаат тераси и простори во кои се добредојдени домашните миленици. Но, најважно е сопственикот однапред да провери дали објектот е pet-friendly, наместо да претпоставува дека неговото куче е добредојдено насекаде.

Службено куче не е исто што и куче за емоционална поддршка

Важна е и разликата меѓу службените кучиња и животните што им обезбедуваат емоционална поддршка на своите сопственици. Според американскиот Закон за лица со попреченост (ADA), службено куче е животно обучено да извршува конкретна задача поврзана со попреченоста на лицето што го придружува. За разлика од нив, кучињата за емоционална поддршка не се сметаат за службени животни во смисла на овој закон.

Службените кучиња имаат посебен правен статус и пристапот до одредени јавни простори не може да им биде ограничен на ист начин како на домашните миленици. Сепак, тоа не значи дека можат да седат на масата или да се хранат заедно со гостите. Според американските прописи, рестораните не се обврзани да им обезбедат посебно место за седење, храна или пијалак.

Исто така, службеното куче може да биде отстрането од објектот доколку не е навикнато да ги извршува своите физиолошки потреби на соодветно место или ако сопственикот не може да го држи под контрола. Самото лаење, меѓутоа, не е автоматска причина за отстранување.

Неколку правила за културно однесување

Ако сакате да го носите својот миленик со себе кога излегувате, имајте ги предвид следниве работи:

• Проверете ги правилата на објектот. Не претпоставувајте дека секое кафуле или ресторан дозволува влез со домашни миленици.

• Не ги игнорирајте ознаките на влезот. Ако пишува дека се дозволени само службени кучиња, тоа правило важи и кога влегувате само накратко.

• Почитувајте ги другите гости. Не секој сака куче покрај својата маса, без оглед на тоа колку е мирно и симпатично.

• Внимавајте на однесувањето на миленикот. Доколку објектот дозволува кучиња, погрижете се животното да биде мирно, под контрола и да не ги вознемирува останатите.

• Не им ја префрлајте одговорноста на вработените. Тие не треба да бидат ставени во ситуација да објаснуваат зошто некој не може да влезе со своето куче, особено кога правилата се јасно истакнати.

На крајот, љубовта кон животните и почитувањето на правилата не се исклучуваат. Можете да бидете посветен сопственик и да сакате вашето куче да биде дел од секојдневието, но тоа не значи дека мора да го носите на секое место. Понекогаш најдобрата одлука е да го оставите дома, а кафето да го испиете без четириножна придружба.

ФОТО: UNSPLASH