Од редење чинии до прерано подавање менија, некои добронамерни гестови можеби изгледаат културно, но всушност му создаваат дополнителна работа на келнерот.
Повеќето од нас низ животот се водат од желбата да им помогнат на другите. Едноставниот чин на љубезност може не само да му го разубави денот некому, туку и да влијае позитивно врз вас самите.
Во ресторан, келнерите секогаш ја ценат соработката од гостите, но понекогаш добрата намера знае да ја засени вистинската помош. Она што на гостите им изгледа како „помош“, често може да биде контрапродуктивно.
Ги гледате келнерите како го прават тоа, па си мислите — колку може да е тешко? Добриот келнер може да расчисти цела маса во еден потег, но зад тоа стојат вежба и вештина. Поголема чинија никогаш не оди врз помала, а длабоката чинија секогаш се става последна. Сè друго брзо се претвора во кула од карти. Дополнително, стуткана салфетка оставена на чинија, па потоа покриена со друга чинија, целосно го нарушува балансот. Иако келнерот го цени трудот, навистина нема потреба да ги редите чиниите — освен ако не сте сигурни дека го правите тоа правилно.
Некои гости мислат дека е корисно да ги стават валканите салфетки или прибор во чашата. Но тоа апсолутно не е така. Приборот ја прави чашата нестабилна и подложна на превртување, а ниту еден келнер не сака да стави рака во чаша полна со натопени, згмечени салфетки. Оставете ги работите на масата — професионалецот ќе знае што да направи.
Никогаш, ама баш никогаш, не земајте ништо од послужавникот што го носи келнерот. Сè на него е внимателно наместено за рамнотежа, а секое тргање бара ново приспособување. Можеби ви изгледа корисно да си ја земете чашата вода сами, но тоа лесно може да заврши со истурена содржина — било да е вода, кафе, сосови или шпагети — право во вашиот скут.
Ако келнерот ви долева вода или кафе, оставете ја чашата на масата. Кревањето и подавањето кон бокалот е рецепт за мала катастрофа, бидејќи келнерот не може прецизно да види кога чашата е полна. А — без навреда — вашата рака можеби не е толку стабилна колку што е потребно. Ако келнерот не може да стигне до празната, едноставно подајте му ја за да ја наполни.
Кога порачувате, користете зборови. Покажувањето со прст не помага, бидејќи келнерот најверојатно не може да го чита менито од местото каде што стои. Ако не го кажувате името затоа што не сте сигурни како се изговара— не грижете се. Келнерот ќе ве разбере. Можеби дури и ќе ве поправи.
Откако ќе порачате, нема потреба веднаш да му го подадете менито на келнерот. Најверојатно рацете му се веќе зафатени, а полесно е да ги собере сите менија откако сите на масата ќе завршат со нарачка. Обидот да се земаат едно по едно само ја комплицира работата. Оставете го менито на масата — келнерот ќе го земе кога ќе биде подготвен.
Ниту една од овие навики нема драматично да му ја отежни работата на келнерот. Тие се случуваат постојано и ретко кој би се налутил. Но тоа се мали навики кои луѓето ги имаат без да сфатат дека не се толку корисни како што мислат.
Најголемата помош што можете да ја дадете во ресторан е едноставна: бидете љубезни, пријателски настроени и учтиви. Истото важи и за келнерите. Помошта е двонасочна улица — но овој пат, дајте му предност на оној чија работа е да ви помогне.
ФОТО: Freepik
Рестораните сè почесто соработуваат со локални производители и фарми. Фокусот е ставен на свежа, сезонска и одржлива храна.
Новиот модел на работа ги спојува сите дневни оброци во еден концепт. Рестораните стануваат флексибилни простори за целодневно дружење.
Белград сè повеќе се издвојува како гастро центар во регионот. Расте бројот на ресторани кои добиваат меѓународни препораки и признанија.
Во повеќе светски метрополи се забележува промена во навиките за вечера. Сè поголем број луѓе резервираат маси во раните вечерни часови. Рестораните реагираат со специјални „early dinner“ менија. Овој тренд е поврзан со здрав начин на живот и промена на работните навики.
Дознајте ги први сите новитети, ексклузивни понуди и настани!
