Што најмногу ги нервира келнерите кај нивните гости? Ова однесување е неприфатливо во рестораните

Јадењето во ресторан е едно од оние мали животни задоволства: добра храна, чаша вино, без да морате да миете купишта садови потоа. Но зад учтивата насмевка и професионалната реченица „уживајте во оброкот“, келнерите честопати толерираат многу неприфатливи начини на однесување што им ја отежнуваат работата повеќе одошто би требало.

Според повеќе анкети, интервјуа и изјави, повеќето келнери не се фрустрираат ако гостинот направи комплицирана нарачка, туку ако нема основни манири и свесност.

Еве кои постапки и реакции најмногу ги нервираат келнерите и зошто…

1. Тропкање со прстите за да се привлече внимание

Ако постои еден гест што генерално ги нервира келнерите, тоа е тропкањето со прстите.  Тропкањето со прстите, нетрпеливото мавтање или извикувањето „Келнер!“ на цел глас се гестови што испраќаат јасна порака: гостинот го гледа келнерот како слуга, а не како професионалец.

Од перспектива на келнерот, овој начин на однесување особено фрустрира, бидејќи рестораните работат според деликатен систем за тајминг. Келнерот честопати е одговорен за повеќе маси одеднаш и секој прекин може да го наруши текот на целата услуга.

Накратко: љубезноста не ја забавува услугата, напротив, ја покренува.

2. Постојано враќање на келнерот

Ова се случува кога гостите постојано го „враќаат“ келнерот со мали барања: прво го викаат за вода, па за салвети, па за кечап, па за екстра виљушка… Индивидуално гледано, секое од овие барања е разумно, но сите заедно создаваат постојани прекини.

Доколку келнерот служи неколку маси одеднаш, овие дополнителни циркулирања низ ресторанот брзо може да се претворат во хаос. Тоа ја забавува услугата за другите гости и го зголемува стресот кога има гужва.

Искусните келнери велат дека решението е едноставно: побарајте сè што ви треба одеднаш.

3. Третирање на келнерот како да е личен асистент

Многу келнери велат дека некои гости се однесуваат со нив како нивната работа да нема граници. Па така, имале гости кои барале работи што воопшто не се дел од нивните обврски – на пример, барале од нив да им завршат нешто неповрзано со ресторанот или барале јадења што воопшто не постоеле на менито. Ова се случува делумно поради тоа што рестораните не поставуваат јасна граница помеѓу гостопримливоста и личната послуга. Гостите плаќаат за пријатно искуство, но тоа не значи дека секое нивно барање е реалистично.

Како што објаснуваат експертите за угостителство, улогата на келнерот е да создаде пријатно ресторанско искуство, а не да го исполнува секое можно барање на гостите.

4. Некултурно однесување кога ќе се случи некоја грешка

Во рестораните сè се случува брзо, па така, повремено се случуваат и грешки – згрешени нарачки, задоцнети јадења или заборавени пијалаци. Но келнерите велат дека начинот на кој реагираат гостите е поважен од самата грешка.

Келнерите се соочуваат со дузина, па дури и стотици интеракции за време на нивната смена. Кога гостите покажуваат трпение и разбирање, обично проблемите се решаваат брзо. Но кога гостите стануваат агресивни или некултурни, искуството е емоционално исцрпувачко.

Повеќето келнери посочуваат дека со задоволство сакаат да си ги поправат грешките – но непријатното однесување ретко кога може да ја подобри ситуацијата.

5. Правење непотребен хаос

Уште една честа фрустрација: гости што ја оставаат масата како да паднала атомска бомба. Нормално е да се истури по нешто, но некои гости оставаат купишта салвети, трошки и истурени пијалаци. Чистењето на масата е дел од работата на келнерите, но преголемиот хаос ја забавува услугата. Повеќето келнери велат дека не очекуваат беспрекорна чистота – само основни манири.

6. Игнорирање на келнерот

Некои келнери го посочуваат и непријатниот момент кога ќе дојдат до масата за да се претстават или да го објаснат менито, но гостите ги прекинуваат и веднаш прават нарачка.

Покрај тоа што ова е некултурно, може да доведе и до практични проблеми: келнерот можеби треба да објасни одредени специјалитети, да провери за алергии или да разјасни некои детали од менито пред да ја земе нарачката.

Во многу ресторани, првичната интеракција овозможува услугата да се одвива поефикасно.

7. Седење со часови без никаква нарачка

Огромна фрустрација во многу кафулиња и лежерни ресторани предизвикуваат таканаречените „кампери на маса“. Ова се гостите што нарачуваат едно кафе и потоа работат на нивниот лаптоп со часови, зафаќајќи маса на којашто би можеле да седнат повеќе луѓе. Од перспективата на рестораните, ова не е само мала непријатност, туку може сериозно да влијае врз профитот на бизнисот за време на периодите кога има најмногу гужва.

Што би им значело на келнерите?

Кога келнерите ги опишуваат најдобрите гости, нивните очекувања се многу едноставни.

Според многу келнери, совршениот гостин е оној кој:

• Вели „ве молам“ и „благодарам“.
• Има јасни барања и нарачува сè одеднаш.
• Се однесува со послугата како со професионални работници.
• Трпелив е ако нешто тргне наопаку.

Со други зборови, тајната на најдобрите гости не е познавањето на менито или кодексот на вечерање – туку основните човечки манири.

Иако главниот фокус во рестораните е храната, на крајот на краиштата, целосното искуство зависи од луѓето. А вашето љубезно однесување може значително да ѝ ја олесни долгата смена на личноста што ви ги носи чиниите.

ФОТО: UNSPLASH