Зошто сладоледот понекогаш предизвикува силна главоболка? Конечно е објаснето што се случува

Летото е незамисливо без сладолед, но многумина барем еднаш доживеале остра главоболка веднаш по првите неколку залчиња. Болката се појавува ненадејно, најчесто во пределот на челото, трае само неколку секунди и исчезнува исто толку брзо колку што се појавила.

Овој феномен е познат како „brain freeze“, а во медицината се нарекува sphenopalatine ganglioneuralgia. Иако името звучи сериозно, станува збор за безопасна и привремена реакција на организмот.

Што всушност се случува?

Кога многу ладна храна или пијалак нагло ќе го допре непцето, крвните садови во тој дел од устата брзо се стеснуваат, а потоа повторно се шират. Оваа ненадејна промена ги активира нервите поврзани со тригеминалниот нерв, кој е одговорен за чувството на болка во лицето и главата.

Според Harvard Medical School, мозокот погрешно ја „префрла“ болката кон челото, па токму таму најчесто ја чувствуваме непријатноста.

Некои луѓе се почувствителни од други. Истражувањата покажуваат дека лицата кои страдаат од мигрена имаат поголема веројатност да искусат ваков вид главоболка.

Како да ја избегнете?

Наједноставниот совет е – не брзајте. Наместо да го изедете сладоледот за неколку секунди, јадете го побавно и дозволете устата постепено да се навикне на студеното.

Ако сепак почувствувате болка, притиснете го јазикот на непцето или испијте неколку голтки млака вода. Така температурата побрзо ќе се изедначи, а главоболката обично исчезнува за помалку од една минута.

Иако е непријатен, „brain freeze“ не е опасен и не остава никакви последици.

pexels – sladoled na plaza