Премалку сол, несоодветна температура и зелка што не е целосно потопена во саламурата се меѓу најчестите причини поради кои наместо крцкава зимница добивате разочарување.
По неколку недели чекање, никој не сака да отвори буре и да открие дека киселата зелка е мека и кашеста. Причината не мора да биде лошиот квалитет на зелката, туку грешките во текот на ферментацијата. Стручните служби при универзитетите во Вермонт, Орегон и Пенсилванија посочуваат дека за добар резултат особено се важни количината на сол, температурата и правилното редење на зелката. Солта помага да се извлече водата од листовите и да се создаде саламура во која се развиваат посакуваните млечнокиселински бактерии. Препорачаната количина е од 15 до 25 грама сол на килограм зелка, односно 1,5 до 2,5 проценти од нејзината тежина. Најдобро е солта да се мери со вага, бидејќи различните видови немаат иста густина.
И премалото и преголемото количество сол може да направат проблем. Недоволната количина овозможува развој на несакани микроорганизми, додека премногу сол ја забавува ферментацијата и може да придонесе за појава на површински квасци и промена на бојата. Според стручните препораки, концентрација под 1,7 проценти може да биде поврзана со омекнување, а над 2,25 проценти со појава на квасци. Важна е и температурата: на 21–24 степени Целзиусови зелката може да биде готова за три до четири недели, додека на 16–18 степени процесот може да трае до шест недели. Под 15 степени ферментацијата може да не се одвива правилно, а над 27 степени се зголемува ризикот зелката да омекне и да се расипе.
Друга честа грешка е зелката да не биде доволно цврсто наредена, со што меѓу листовите останува воздух. Во текот на ферментацијата таа мора постојано да биде целосно потопена во саламурата, за да се намали можноста за развој на мувла. За таа цел може да се притисне со чиста чинија и соодветен товар, а садот да се покрие со чиста крпа или газа. Ако се користат тегли наполнети со вода како товар, зелката треба да се проверува два до три пати неделно. Не е сеедно ниту во каков сад се кисели: се препорачуваат стаклени садови и пластика наменета за контакт со храна, додека бакарните, железните и поцинкуваните метални садови треба да се избегнуваат.
За најдобар резултат, избирајте здрави, цврсти и слатки главици од доцни сорти зелка, бидејќи раните сорти имаат помалку шеќер и може послабо да ферментираат. Правилно подготвената кисела зелка треба да биде цврста и пријатно киселкаста, без знаци на мувла или квасци, а саламурата не треба да биде матна. Ако зелката стане лигавa, се појави мувла или се почувствува непријатен мирис, не ја пробувајте. Стручните служби советуваат зелката што скапала или ја зафатила мувла да се фрли. Правилно ферментираната зелка, пак, може да се чува неколку месеци во добро затворен сад во фрижидер.
pexel
Богати се со протеини, растителни влакна, здрави масти и витамин Е. Бадемите можат да помогнат во одржувањето на здравјето на срцето, подоброто варење и подолгото чувство на ситост.
Сирењето може да се исуши или да мувлоса ако не се чува правилно, а решението можеби веќе го имате во кујната. Еве како да ја зачувате неговата свежина и вкус подолго.
Кинески цар потрошил огромно богатство за да најде лек за својата сакана, а така настанал овој традиционален десерт кој денес е популарен ширум светот
При изборот на месо, купувачите често се водат според неговата боја, но таа не е секогаш сигурен показател за квалитетот. Важни се и мирисот, површината, пакувањето и условите на чување.
Дознајте ги први сите новитети, ексклузивни понуди и настани!
