Мал трик со помош на кој кафето може да стане послатко – без шеќер

Кога станува збор за приготвување кафе, понекогаш и најмалите детали прават голема разлика. Количината на водата, температурата, мелењето, видот и свежината на зрната – сето тоа влијае врз финалниот вкус. Но постои уште еден фактор на кој можеби досега не сте обрнувале внимание: каде точно ја истурате водата врз меленото кафе.

Според експертите, ако приготвувате попарено кафе, една едноставна промена во техниката може да резултира со посладок и помалку горчлив вкус, без да додадете ниту грам шеќер. Трикот е водата да ја насочите главно кон центарот на кафето, наместо да ја истурате по рабовите.

Зошто токму центарот?

Хајди Расмусен, директорка за едукација, квалитет и одржливост во illycaffè North America, објаснува дека истурањето вода во центарот помага меленото кафе да остане постабилно, што овозможува порамномерно извлекување на шеќерите и ароматичните соединенија од зрната.

Според нејзините истражувања, кафето приготвено со истурање вода во центарот имало забележливо посладок вкус и нешто полесна текстура во споредба со кафето кај кое водата била истурана пошироко. Сепак, ова не значи дека централното истурање вода е „подобро“ во секоја ситуација – вкусот на кафето е индивидуален, а и истурањето поблиску до рабовите има свои предности, меѓу кои и намалување на можноста за создавање канали низ кои водата пребрзо ќе поминува низ кафето.

Интересно е што авторката нагласува дека сè уште нема доволно рецензирани научни истражувања што директно го потврдуваат овој ефект. Досегашните сознанија главно се темелат на практични тестирања и искуства од подготовката на кафе.

Како да го пробате трикот дома?

За околу 500 милилитри кафе, стручната препорака е да употребите 25 грама кафе, мелено на средно-фина големина, и вода загреана на околу 93–96 °C.

Прво, навлажнете го кафето со околу 40–50 милилитри вода и оставете го да отстои 30–40 секунди. Потоа продолжете полека да ја истурате водата со кружни движења, но задржете го истурањето главно во централниот дел. Идејата е да избегнете премногу турбуленции и водата рамномерно да минува низ кафето.

Целиот процес треба да трае околу три и пол минути, по што кафето е подготвено за сервирање.

Уште неколку детали за подобра шолја кафе

Температурата на водата исто така е важна. За посладок и побалансиран резултат, се препорачува вода меѓу 93 и 96 °Ц, бидејќи премногу жешката вода може побрзо да извлече непријатни, остри и горчливи ноти.

Добра идеја е да користите свежо кафе, бидејќи со текот на времето зрната губат дел од своите ароми и можат да станат погорчливи. За побалансиран вкус се препорачува и средно печено кафе – темното печење почесто ги нагласува горчливите ноти, додека посветлото може да биде поизразено киселкасто.

На крајот, можеби најубавиот дел е што не ви треба ново кафе, посебен сируп или дополнителна лажичка шеќер. Понекогаш само начинот на кој ја истурате водата може да ја промени целата шолја.